Қазақстанда банктер туралы жаңа заң қабылданды
Мәжіліс Сенат енгізген өзгерістерді ескере отырып, "Банктер және банк қызметі туралы" заң жобасын және оған ілеспе түзетулерді қабылдады. Бұл туралы Stan.kz ақпарат агенттігі хабарлайды.
Еске сала кетейік, 25 желтоқсанда Сенатта банктер туралы заң бірінші оқылымда қаралды. Талқылау барысында депутат Амангелді Нұғманов банктерге қойылатын тым қатаң талаптар несиелердің қолжетімділігін төмендетуі мүмкін екенін айтты.
"Реттеуді шамадан тыс қатайту несие ресурстарының қолжетімділігінің төмендеуіне, инвестициялық белсенділіктің әлсіреуіне және экономиканың нақты секторына қаржы ағындарының қысқаруына әкелуі мүмкін", - деген болатын депутат.
Сенатордың айтуынша, маңызды мәселелер бойынша сарапшылар мен мемлекеттік органдар нақты жауап бермеген. Сондықтан банктерге бақылауды күшейту олардың тұрақты жұмысына және экономиканың дамуына кедергі келтірмес үшін заңды қайта пысықтау қажет.
Сенат төрағасы Мәулен Әшімбаев бұған дейін негізгі комитет заңның кейбір баптарын мақұлдамауды және оларды жаңа редакцияда Мәжіліске қайтаруды ұсынып отырғанын хабарлаған. Кестеде 16 түзету ұсынылған.
Айта кетейік, Қазақстандағы жаңа банктер туралы заң жобасы банктерді лицензиялау рәсімін жеңілдетуді көздейді.
Комитет Сенаттың банк секторын реттеуге қатысты бірқатар маңызды мәселелерді қамтитын нақтылаушы түзетулерімен келісті. Атап айтқанда, банк құпиясын сақтау талаптарын қазынашылық органдарына да қолдану ұсынылады.
Сондай-ақ деректер витринасын енгізу мақсаттары мен онда қамтылуға тиіс ақпарат тізбесі нақтыланады. Тиісті нормаларды енгізу мерзімін 2026 жылғы 1 маусымнан 2027 жылғы 1 қаңтарға ауыстыру ұсынылады.
Бұдан бөлек, базалық банк лицензиясынан әмбебап лицензияға көшу кезінде пруденциялық нормативтерді сақтау талаптары нақты көрсетіледі.
Жеке тармақ ретінде Қазақстан Республикасының резиденті емес ислам банктері филиалдарына инвестициялық қызметтің жекелеген түрлерін жүзеге асыру құқығын беру көзделген.
Енгізілген өзгерістер мен толықтырулар жалпы алғанда банк қызметін реттеуді жетілдіруге, қаржы жүйесінің ашықтығын арттыруға және елдің қаржы нарығын дамытуға бағытталған.
